Եվրախորհրդարանում Արցախի շրջափակման հումանիտար հետեւանքների մասին բանաձեւ է ներկայացվել

Եվրախորհրդարանում Արցախի շրջափակման հումանիտար հետեւանքների մասին բանաձեւ է ներկայացվել, որում կոչ է արվում Ադրբեջանի իշխանություններին ապահովել Լաչինի միջանցքով ազատ եւ անվտանգ տեղաշարժը։ Փաստաթղթի վերաբերյալ քննարկումը կկայանա հունվարի 18-ին։ Քվեարկությունը նախատեսված է վաղը։

«Հաշվի առնելով այն, որ 2022 թվականի դեկտեմբերի 12-ին Լեռնային Ղարաբաղը Հայաստանին կապող միակ ճանապարհը արգելափակվել է, ինչը խախտում է այնտեղ բնակվող տասնյակ հազարավոր հայերի հիմնական ապրանքների եւ ծառայությունների հասանելիությունը եւ թույլ չի տալիս Լեռնային Ղարաբաղի բնակիչներին լքել տարածաշրջանը, Եվրախորհրդարանը դատապարտում է Ադրբեջանի կառավարության գործողությունները եւ կոչ է անում Ադրբեջանի իշխանություններին ապահովել միջանցքով, այդ թվում՝ օդով տեղաշարժվելու ազատությունն ու անվտանգությունը՝ 2020 թվականի նոյեմբերի 9-ի եռակողմ հայտարարության համապատասխան»։

Եվրախորհրդարանի անդամները կոչ են անում Ադրբեջանին զերծ մնալ հետագայում Լեռնային Ղարաբաղը Հայաստանի հետ կապող տրանսպորտային եւ էներգետիկ հաղորդակցության խափանմանն ուղղված գործողություններից։ Եվրախորհրդարանը նաեւ կոչ է անում անհապաղ ապահովել ՄԱԿ-ի համապատասխան գործակալությունների եւ միջազգային ՀԿ-ների մուտքը ԼՂ՝ իրավիճակի գնահատման եւ մարդասիրական օգնության ցուցաբերման համար։ Խորհրդարանականները Ադրբեջանին կոչ են անում նաեւ երաշխավորել, որ «Լաչինի միջանցքի ռազմավարական ճանապարհը կմնա բաց, եւ ոչ մի ցույց չի կարողանա ԼՂ բնակչին զրկել հիմնական ծառայություններին եւ ապրանքներին հասանելիությունից, ազատ տեղաշարժից՝ անկախ նրանից, թե արդյոք ցուցարարներն ունեն իրական բնապահպանական խնդիրներ կամ այլ պահանջներ»։ Բանաձեւում խորհրդարանականները նաեւ կոչ են անում ԵՄ ներկայացուցչություններին եւ անդամ պետություններին ուժգնացնել իրավապաշտպանների աշխատանքին աջակցությունը եւ անհրաժեշտության դեպքում աջակցել վիզաների տրամադրմանն ու ԵՄ անդամ պետություններում ժամանակավոր ապաստան տրամադրելուն։

«Կոչ ենք անում բոլոր կողմերին, ներառյալ՝ ԵՄ-ին, աջակցել քաղաքացիական հասարակության գործունեությանը Հայաստանի եւ Ադրբեջանի միջեւ երկխոսության հաստատման գործում՝ տարածաշրջանում շուտափույթ փոխվստահության եւ երկարաժամկետ խաղաղության նպատակով պայմանների հաստատման համար։ Համապարփակ խաղաղության համաձայնագիրը պետք է ապահովի Լեռնային Ղարաբաղի հայ բնակչության իրավունքների եւ անվտանգության ամուր երաշխիքները։ Կոչ ենք անում ԵՄ-ին ավելի ակտիվ դեր խաղալ Լաչինի միջանցքում իրավիճակի ապաէսկալացիայի գործում։ Հանձնարարում ենք նախագահին այս բանաձեւն ուղարկել Մարդու իրավունքների հարցերով փոխնախագահին, խորհրդին, հանձնաժողովին, անդամ պետություններին, Հայաստանի եւ Ադրբեջանի կառավարություններին եւ խորհրդարաններին»,-նշվում է բանաձեւում։ Բանաձեւի հեղինակներն են եվրախորհրդարանականներ Վիոլա ֆոն Կրամոն-Տաուբադելը, Միշել Ռիվազին, Սառա Վիները, Իգնասիո Կորեան, Հաննա Նյումանը, Անա Միրանդան, Ռոզա Դ'Ամատոն, Ֆրանցիսկո Գերեյրոն, Ժորդի Սոլեն, Մարկետա Գրեգորովան, Տինեկե Շտրիկը: