Ուկրաինան պատրաստ է քննարկել անվտանգության այլընտրանքային երաշխիքներ՝ ՆԱՏՕ-ին անդամակցության փոխարեն, պայմանով, որ այդ երաշխիքներն ունենան հավասար իրավական ուժ։ Այս մասին Ուկրաինայի նախագահ Վլադիմիր Զելենսկին հայտարարել է Corriere della Sera թերթին տված հարցազրույցում։
Ըստ նրա՝ Ուկրաինայի անվտանգության երաշխիքների օպտիմալ ձևաչափը պետք է ներառի երեք տարր՝ Ուկրաինայի զինված ուժերը, Եվրամիությունը և ՆԱՏՕ-ն։
Ուկրաինայի նախագահը նշել է, որ եթե երկրի՝ ՆԱՏՕ-ին անդամակցելու հարցը օրակարգում չէ, ապա դրա փոխարեն պետք է առաջարկվի համարժեք այլընտրանք։
«Եթե ոչ ՆԱՏՕ-ն, ապա ի՞նչ է առաջարկվում դրա փոխարեն։ Մենք պատրաստ ենք քննարկել համարժեք երաշխիքներ՝ թեկուզ այլ անվանմամբ, պայմանով, որ դրանք ունենան նույն իրավական ուժը», – ընդգծել է նա։
Զելենսկին շեշտել է, որ Ուկրաինան ձգտում է ստանալ անվտանգության այնպիսի երաշխիքներ, որոնք կլինեն իսկապես արդյունավետ։
